Në kuadër të aktiviteteve të veta për komunikim me përfaqësues të organizatave ndërkombëtare në Republikën e Maqedonisë së Veriut, Avokati i Popullit z. Faton Selami u takua me znj. Rita Columbia, Koordinatore e Përhershme e Kombeve të Bashkuara në Republikën e Maqedonisë së Veriut.
Në takim u diskutua për rëndësinë e Institucionit të Avokatit të Popullit, si një nga institucionet më të rëndësishme për mbrojtjen e të drejtave të qytetarëve, si dhe për sfidat aktuale me të cilat përballet ky institucion. Me këtë rast, theks i veçantë u vendos edhe në nevojën për ndryshime dhe plotësime të Ligjit për Avokatin e Popullit me qëllim përmbushjen e plotë të Parimeve të Parisit dhe marrjen e statusit A.
Avokati i Popullit Mr. Faton Selami theksoi se në periudhën e ardhshme do të punojë me intensitet për përmirësimin e statusit të institucionit, para së gjithash në pjesën e ndryshimeve të nevojshme ligjore. Ai falënderoi për mbështetjen që institucioni e merr nga zyra e OKB-së në Republikën e Maqedonisë së Veriut dhe njëkohësisht potencoi se mbështetja dhe angazhimi i kësaj zyre për ndryshimet ligjore është me rëndësi të madhe.
Të dy bashkëbiseduesit u pajtuan gjithashtu se në periudhën e ardhshme duhet të punojnë së bashku, me qëllim që rekomandimet e fundit të Rishikimit Periodik Universal që kanë të bëjnë me Avokatin e Popullit të zbatohen dhe institucioni edhe në praktikë ta fitojë pavarësinë funksionale, financiare dhe kadrovike.
Burimi: alfax.mk
