Avionët luftarakë polakë janë ngritur sot në ajër për të interceptuar një avion zbulues rus të tipit Il-20, i cili fluturonte mbi Detin Baltik, rreth 30 kilometra në veri të qytetit polak të Łeba-s. Ministri polak i Mbrojtjes, Władysław Kosiniak-Kamysz, deklaroi se incidenti ndodhi para mesditës dhe e cilësoi lëvizjen e avionit rus si një tjetër testim të gatishmërisë së mbrojtjes polake.
“Rusia ka testuar përsëri sistemet tona të parandalimit dhe mbrojtjes ajrore”, tha ministri. Megjithatë, sipas autoriteteve polake, avioni rus nuk ka shkelur hapësirën ajrore të Polonisë dhe ka qëndruar mbi ujërat ndërkombëtare të Detit Baltik. Ky nuk është rasti i parë i këtij lloji. Avionët rusë të zbulimit janë interceptuar disa herë nga avionët polakë gjatë muajve të fundit, ndërsa Varshava e konsideron praninë e tyre pranë territorit të NATO-s si një provë të vazhdueshme të gatishmërisë së aleancës. Il-20 është një avion i specializuar për zbulim elektronik dhe mbledhje informacioni, përfshirë monitorimin e komunikimeve dhe sinjaleve të radarëve.
Në raste të tilla, interceptimi zakonisht nënkupton afrimin e avionëve luftarakë për identifikimin vizual të mjetit dhe sinjalizimin e tij për t’u larguar, pa përbërë domosdoshmërisht një përballje ushtarake.
Incidenti i fundit vjen në një periudhë tensioni të shtuar në krahun lindor të NATO-s, ndërsa Polonia dhe vendet baltike kanë paralajmëruar për rritjen e aktiviteteve ajrore ruse pranë hapësirës së aleancës.
Burimi: botasot.info
