Avion Canadair nga Italia për shuarjen e zjarreve në jug të vendit, ministria e Mbrojtjes

Ministria e Mbrojtjes ka njoftuar se, në kuadër të Mekanizmit të Mbrojtjes Civile të Bashkimit Europian, një avion zjarrfikës i tipit Canadair është nisur nga Italia dhe do të angazhohet në operacionet ajrore për shuarjen e zjarreve në jug të vendit.

Ky avion do të ndërhyjë në zonat e Borshit, Piqerasit dhe Lukovës, të cilat po përballen me flakë të përhapura në terrene të thella dhe të vështira për ndërhyrje nga toka.

Sipas Ministrisë, ky mjet ajror do të forcojë ndjeshëm kapacitetet për menaxhimin e emergjencës dhe për frenimin e përhapjes së flakëve në zona turistike dhe pyjore me rrezik të lartë.

Ndërkohë, helikopterët e Forcës Ajrore shqiptare po vijojnë ndërhyrjet nga ajri në fshatin Zhulat, rajoni i Gjirokastrës, si dhe në zonën e Qafë Buallit, pranë Bulqizës, ku gjithashtu situata mbetet e tensionuar.