Autori i vrasjes së ish-kryeministrit japonez Shinzo Abe, pranon fajin

Një burrë i akuzuar për vrasjen e ish-kryeministrit japonez Shinzo Abe ka pranuar fajin që në ditën e parë të gjyqit ndaj tij në Tokio.

Tetsuya Yamagami, 45 vjeç, tha në gjykatë se “çdo gjë është e vërtetë”, raporton BBC. Ai kishte përdorur një armë të prodhuar vetë për të qëlluar Abe gjatë një tubimi elektoral në qytetin perëndimor të Nara-s në korrik të vitit 2022.

Abe, një nga figurat më të njohura të politikës japoneze moderne, i njohur për politikën e tij të jashtme nacionaliste dhe për strategjinë ekonomike të quajtur “Abenomics”, u qëllua disa herë dhe ndërroi jetë në spital të njëjtën ditë. Vrasja e tij tronditi Japoninë dhe komunitetin ndërkombëtar.

Hetimet zbuluan se Yamagami e kishte shënjestruar ish-kryeministrin sepse e fajësonte për lidhjet e supozuara mes Partisë Liberale Demokratike (LDP), në pushtet për dekada, dhe Kishës së Unifikimit, të njohur ndryshe si “Moonies”.

Yamagami u kishte thënë hetuesve se e kishte fajësuar Abe-në për promovimin e kishës, e cila, sipas tij, kishte shkatërruar financiarisht familjen e tij. Në dëshmitë e tij, ai pretendon se nëna e tij kishte dhuruar rreth 100 milion jenë (rreth 660 mijë dollarë) për kishën, si dëshmi e besimit të saj.

Kjo çështje shkaktoi një valë hetimesh në Japoni mbi aktivitetet e Kishës së Unifikimit, e themeluar në Korenë e Jugut dhe e njohur për ceremonitë e saj të martesave masive. Katër ministra japonezë dhanë dorëheqjen pas zbulimeve për lidhje të mundshme me organizatën.

Në mars të këtij viti, një gjykatë në Tokio urdhëroi shpërbërjen e Kishës së Unifikimit në Japoni, duke i hequr statusin e përjashtimit nga taksat dhe duke kërkuar likuidimin e aseteve të saj.

Megjithatë, sipas The Japan Times, nëna e Yamagamit nuk ka ndryshuar qëndrim. Përkundrazi, ajo ka deklaruar se vrasja e Abe-t e ka forcuar besimin e saj fetar.

Gjyqi i Yamagamit pritet të zgjasë deri në janar të vitit të ardhshëm, ndërsa mbrojtja ka kundërshtuar disa nga akuzat për shkelje të ligjit mbi armët, duke argumentuar se arma e improvizuar e përdorur nuk klasifikohet si armë zjarri sipas legjislacionit aktual.

Pas atentatit ndaj Abe-t, Japonia, një vend me nivelet më të ulëta të dhunës me armë në botë, ka forcuar më tej ligjet që rregullojnë posedimin dhe prodhimin e armëve artizanale.

Vrasja e Shinzo Abe ka hapur debate të mëdha për sigurinë e politikanëve, rolin e organizatave fetare në politikë dhe rregullimin e ligjeve për armët, në një vend ku krimet e tilla janë jashtëzakonisht të rralla.