Sektori për Punë të Brendshme Tetovë e ka zbardhur rastin në të cilin gjatë ditës së djeshme (03.09.2025) në Tetovë u sulmuan fizikisht dy të mitur. Më 03.09.2025, në orën 22:30, në rrugën “Prilepska” në Tetovë, zyrtarë policorë të SPB Tetovë privuan nga liria N.Ç. (20) nga Tetova, ndërsa më 04.09.2025, në orën 12:10, në rrugën “Ilindenska” privuan nga liria D.D. (23) nga fshati Radiovcë. Gjithashtu, është kryer bisedë zyrtare me 16 të mitur. Ata dyshohen se rreth orës 18:00, në rrugën “Blagoja Toska” në Tetovë, në grup, kanë sulmuar fizikisht një 17-vjeçar dhe një 15-vjeçar, të dy nga fshati Dobrosht, komuna Tearcë, të cilët po dilnin nga shkolla e mesme.
Sipas denoncimit të prindërve të tyre, Q.E. (50) dhe H.I. (43) nga Dobroshti, djemtë e tyre kanë qenë me një të mitur tjetër, i cili ka arritur të ikë, ndërsa pjesëtarët e grupit kanë qenë tifozë të klubit futbollistik të Tetovës. Pas sulmit, dy të miturit janë dërguar në spitalin klinik të Tetovës për të marrë ndihmën e nevojshme mjekësore. Pas dokumentimit të rastit, në bashkëpunim me prokurorin publik, ndaj sulmuesve do të ngriten kallëzimet përkatëse.
