Kumanovë, 11 korrik – Zëvendëskryeministri Arben Fetai ka prezantuar sot në Kumanovë Planin Operativ për Punësim 2025, me një buxhet prej 40 milionë eurosh që synon të përfshijë mbi 16.000 qytetarë në mbarë vendin. Ky plan ambicioz parasheh masa konkrete për punësim, vetëpunësim dhe trajnime profesionale, si pjesë e përpjekjeve për të rritur mundësitë ekonomike dhe për të fuqizuar kapitalin njerëzor, përcjell Zhurnal.mk.

“Është ndjesi e veçantë të flasësh për të ardhmen në qytetin ku kam hedhur hapat e parë. Të jesh pranë njerëzve me të cilët ndaj kujtime, rrënjë dhe përgjegjësi, i jep kësaj nisme një domethënie të veçantë,” theksoi Fetai gjatë fjalës së tij.

Ai shtoi se ky plan është një investim strategjik për të rinjtë dhe brezin e ardhshëm, duke theksuar rëndësinë e qëndrimit aktiv dhe të palëkundur në ndërtimin e një të ardhmeje më të sigurt dhe më të drejtë për të gjithë.

“Vazhdojmë pa u ndalur,” përfundoi Fetai, duke lënë të kuptohet se nismat për zhvillim dhe përparim do të vazhdojnë me intensitet të shtuar.

Burimi: zhurnal.mk