Pas një viti të mbushur me suksese në skenat ndërkombëtare, me pjesëmarrje në festivalet prestigjioze në Dubai, Pamukkale dhe Bodrum të Turqisë, Ansambli “Ibe Palikuqi” tashmë do të udhëtojë drejt Bullgarisë për të sjellë para publikut ndërkombëtar traditën dhe kulturën shqiptare.
Ftesa për të marrë pjesë në këtë aktivitet erdhi nga Komuna e Septemvrit dhe Ansambli Folklorik “Zagorovche”. Ansambli ynë do të jetë pjesë e edicionit të tretë të festivalit ndërkombëtar “September Folklore Holidays”, i cili do të mbahet nga 19 deri më 21 shtator 2025 në Bullgari.
Me një grup prej rreth 30 pjesëmarrësish valltarë, udhëheqës dhe drejtues “Ibe Palikuqi” do të prezantojë disa valle nga repertori tradicional shqiptar, duke sjellë para publikut të gjerë thesarin tonë kulturor.
“Ky është një hap i rëndësishëm për afirmimin e kulturës sonë në skenën evropiane. Falënderojmë të gjithë mbështetësit dhe dashamirët e kulturës shqiptare. Do të kthehemi me përvoja të reja, emocione dhe kujtime të paharrueshme,” u shprehën nga ansambli.
