Ansambli i Këngëve dhe Valleve “Ibe Palikuqi” ka dhuruar një spektakël të paharrueshëm në Sharjah të Emirateve të Bashkuara Arabe, në kuadër të aktiviteteve kulturore “Sharjah Heritage Days”. Me një performancë plot ngjyra, ritëm dhe energji folklorike, artistët shqiptarë prezantuan para publikut ndërkombëtar vlerat autentike të traditës sonë.
Mbrëmja u zhvillua në praninë e personaliteteve të rëndësishme kulturore të Emirateve, si dhe artistëve nga vende të ndryshme të botës. Spektaklin e ndoqi edhe djali i mbretit të Sharjahut, nga familja Al Qasimi, His Highness Sheikh Mohammed bin Sultan, duke i dhënë kështu një peshë të veçantë paraqitjes së ansamblit shqiptar.
Eventin e nderoi me pjesëmarrjen e tij edhe Drejtori i Institutit për Trashëgimi Kulturore, Dr. Abdul Aziz Al Musallam, i njohur për mbështetjen e promovimit të kulturave në arenën ndërkombëtare. Përfaqësuesit e ansamblit u shprehën krenarë për prezantimin dinjitoz të kulturës shqiptare dhe falënderuan organizatorët për mikpritjen në Sharjah.
