Tetovë, 22 korrik – Bilall Kasami, kryetari aktual i komunës, do të kërkojë mandatin e dytë përballë Bajram Rexhepit nga BDI. Sipas një ankete të realizuar nga UBO Consulting, Kasami del fitues bindshëm në preferencat e qytetarëve shqiptarë për kryetar të Tetovës.

Në fillim, kandidati më i preferuar pas Kasamit ka rezultuar të jetë Ilir Demiri nga Aleanca për Shqiptarët (ASH), pjesë e Frontit Evropian. Mirëpo, pas ndarjes së komunave brenda koalicionit, Tetova i është caktuar BDI-së. Si rrjedhojë, BDI ka vendosur të garojë me nënkryetarin e saj, Bajram Rexhepi.

Anketa është zhvilluar më 9, 10 dhe 11 korrik, me metodë përzgjedhjeje rastësore çdo të tretën shtëpi nga ana e majtë, dhe përfshin 600 të anketuar. Rezultatet në përqindje janë si më poshtë:

Bilall Kasami – 43.7%
Ilir Demiri – 24.6%
Bajram Rexhepi – 3.9%
Miqireme Rusi – 2.2%
Tjetër – 1.5%
Nuk e di / I pavendosur – 7.5%
Asnjërin – 15%
Refuzoj të përgjigjem – 2.3%

Këto të dhëna sinjalizojnë një epërsi të ndjeshme të Kasamit në këtë fazë parazgjedhore, ndërsa koalicionet rivale ende po përpiqen të konsolidojnë mbështetjen e tyre në qytetin kyç të Tetovës. /Tetova1

Burimi: zhurnal.mk