Ambasadori gjerman në Tiranë Karl Bergner, ka vlerësuar punën e SPAK nën drejtimin e kryeprokurorit Altin Dumani, duke vënë theksin tek rezultatet e këtij institucioni në luftën kundër korrupsionit dhe krimit të organizuar.
Në një mesazh në rrjetin social facebook, ambasadori Bergner, duke komentuar procesin e nisjes nga KLP për të zgjedhur kreun e ardhshëm të SPAK, ka theksuar se ky proces duhet të jetë transparent, i bazuar në meritë dhe i lirë nga ndikimi i jashtëm
“Në vitet e fundit, nën udhëheqjen e Altin Dumanit, SPAK ka dhënë kontribute të jashtëzakonshme në luftën kundër korrupsionit dhe krimit të organizuar në Shqipëri. Besimi i madh i popullsisë shqiptare dhe partnerëve ndërkombëtarë të Shqipërisë në punën e SPAK e thekson në mënyrë mbresëlënëse këtë.
“Procesi i nisur sot nga Këshilli i Lartë i Prokurorisë për të zgjedhur kreun e ardhshëm të SPAK duhet të jetë transparent, i bazuar në meritë dhe i lirë nga ndikimi i jashtëm.
Pavarësia e gjyqësorit, e cila duhet të demonstrohet në procesin e nisur sot, por edhe në veprimet e përditshme të organeve ekzekutive dhe legjislative, është një kriter kyç për Gjermaninë në lidhje me sundimin e ligjit dhe nivelin e përgatitjes së Shqipërisë për anëtarësim në BE”, shkruhet në mesazhin e ambasadorit të Gjermanisë në Shqipëri, Karl Bergner.
Burimi: botasot.info
