Ambasadori i Shqipërisë në Shkup, Denion Meidani, ka zhvilluar një takim të ngrohtë me Dede Naumin, të cilin e cilësoi si një personalitet të rrallë, erudit dhe me kontribut të vazhdueshëm për komunitetin.
Gjatë takimit, Ambasadori Meidani vlerësoi njohuritë e thella të Peshkopit Naum në histori dhe gjuhë, si dhe jetën e tij të pasur me arritje, pozitivitet dhe angazhim shoqëror. Ai theksoi se Peshkopi Naum mbetet një figurë frymëzuese, që rrezaton qetësi, mençuri dhe tolerancë.
Biseda u fokusua në rëndësinë e dialogut ndërfetar dhe ndërkomunitar, rolin e institucioneve shpirtërore në forcimin e kohezionit shoqëror, si dhe sfidat e kohës moderne, ku mirëkuptimi, respekti dhe empatia janë më të domosdoshme se kurrë.
Në përfundim, Ambasadori Meidani nënvizoi se Peshkopi Dede Naum përfaqëson shembullin e një udhëheqësi që ndërton ura mes njerëzve dhe komuniteteve, duke promovuar bashkëjetesën dhe vlerat universale njerëzore.
