Aludimet për pakt me Ramën për Ministrinë e Bujqësisë, Braçe: Hani paratë e pista të disave, edhe brenda PS që ju paguajnë

Pas aludimeve për pakt me Ramën për Ministrinë e Bujqësisë, deputeti Erion Braçe, ka reaguar.

“Po tani?! Pesë ditë me radhë, Braçe në pazar me Ramën: Merr Bujqësinë, meqë e ke merak, dhe ik nga Bashkia e Tiranës! Pesë ditë rresht në çdo portal e media online. Shpërndarë pafund kudo, shoqëruar me linçim online.

Madje dje, një që po e quaj media, shkruante: Qeni që leh nuk të ha, sidomos kur e bën ministër!

Po turp a ke?! Apo ç’të duhet, më mirë kështu! Dëgjoni, një gjë dua ta ndaj me cilindo që më ndjek e më ka votuar drejtpërdrejt 30 vite me radhë;

Ato 25 mijë votat në qarkun Tiranë e diasporë, 19.300 votat në Bashkinë Tiranë, mijëra vota mbledhur në zgjedhje të drejtpërdrejta në 30 vite, s’i kam këmbyer kurrë në pazar personal!

Nuk kanë qenë, nuk janë, nuk do të jenë kurrë nevoja të miat karriget! Gjithë jetën ia kam kushtuar punës, pooo puna është nevojë e imja, atë dua, punën!

Tani, hani pazaret tuaja, siç hani paratë e disa pisave, një pjesë edhe brenda PS-së që ju paguan juve”, tha Braçe.