Në një reagim të ashpër pas zgjedhjeve të 19 tetorit, Tishi Dervishi, aktivist i BDI-së në Tetovë ka akuzuar funksionarët e partisë për arrogancë, mospërfillje ndaj qytetarëve dhe devijim nga vlerat e Ali Ahmeti, shkruan BLIC.MK
Sipas tij, zgjedhjet e 19 tetorit treguan qartë ndarjen mes atyre që janë me popullin dhe atyre që e kanë harruar.
“Tetova e pa qartë kush e do popullin dhe kush e ka harruar! Blerim Osmani dhe Faton Ahmeti, bashkë me disa ish drejtorë e ish ministra, humbën lagjet e veta me mbi 500 vota sepse ngritën kokën lart dhe harruan njerëzit që i sollën deri këtu,” shkruan Dervishi.
Ai ka akuzuar funksionarët e BDI-së për arrogancë dhe mospërgjegjësi, duke theksuar se “nuk hapin telefona, nuk ndihmojnë qytetarët dhe nuk janë me popullin”.
Në statusin e tij, ai thekson se këta individë “ia kanë marrë fytyrën Ali Ahmetit, një njeriu që e ngriti këtë parti me sakrificë, me djersë e me luftë për barazi e dinjitet”.
“Sot, për faj të tyre, partia është prishur nga brenda sepse disa mendojnë për poste, jo për njerëz. Por populli nuk fle. Populli e njeh të drejtën, e njeh punën dhe e njeh kush është me zemër!” ka shkruar më tej Dervishi.
