Zyra për Mbrojtjen e Kushtetutës mbush 75 vjeç. Në këtë përvjetor, qeveria gjermane planifikon që të përmirësohet mbrojtja kundër spiunazhit. 75 vjet pas themelimit të saj, Zyra Federale për Mbrojtjen e Kushtetutës po riorientohet për t’u përgatitur më mirë kundër spiunazhit, sabotimit dhe sulmeve kibernetike. Sipas Ministrit të Brendshëmtë Gjermanisë, Alexander Dobrindt, ekziston “një kërcënim në rritje nga fuqitë e huaja”.
Zyra Federale për Mbrojtjen e Kushtetutës – garanci e lirisë
Dobrindti tha në një ceremoni përkujtimore të përvjetorit të Zyrës Federale për Mbrojtjen e Kushtetutës në Berlin se prandaj është më e rëndësishme se kurrë të mbrohet në mënyrë aktive Kushtetuta. Politikanii CSU-së theksoi se koalicioni midis konservatorëve dhe socialdemokratëve do të krijojë kushtet e nevojshme ligjore dhe teknike për të garantuar të ardhmen e Zyrës Federale për Mbrojtjen e Kushtetutës. Zyra Federale për Mbrojtjen e Kushtetutës është “një garanci e lirisë sonë dhe mburoja mbrojtëse e demokracisë sonë”.
“Aftësitë e kundërshtarëve janë rritur”
Presidenti i ri i Zyrës Federale për Mbrojtjen e Kushtetutës, Sinan Selen, deklaroi në fjalimin e tij prezantues se detyra më e rëndësishme sot është mbrojtja kundër kërcënimeve hibride si sabotimi, spiunazhi dhe sulmet kibernetike. Kompleksiteti, numri i kundërshtarëve, aftësitë e tyre dhe shpejtësia janë rritur ndjeshëm kohët e fundit. Prandaj, tha ai, është e nevojshme të forcohet arkitektura e sigurisë, “teknikisht, fizikisht dhe mendërisht”.
Themelimi 75 vjet më parë
Zyra Federale për Mbrojtjen e Kushtetutës, me seli në Këln, u themelua më 7 nëntor 1950, me pëlqimin e Aleatëve Perëndimorë. Në atë kohë, ata e shihnin shërbimin e ri të inteligjencës si një fortesë kundër spiunazhit sovjetik dhe infiltrimit komunist.
Megjithatë, duke pasur parasysh historinë e Gjermanisë gjatë regjimit nazist, ata shprehimisht nuk e lejuan shërbimin e fshehtë të brendshëm të Gjermanisë të ketë asnjë formë kompetence policore. Ky parim i ndarjes mbetet në fuqi edhe sot. / DW
Burimi: botasot.info
