Shkup, 21 janar – Gjykata Penale e Shkupit dënoi me katër vjet burg ish-drejtorin e Klinikës së Geriatrisë, Muhsin Arifin, për veprën penale të marrjes së ryshfetit, ndërsa bashkëpunëtori i tij, Blerim Ameti, u dënua me një vit e dhjetë muaj burg. Gjykata vlerësoi si rrethana rënduese peshën dhe mënyrën e kryerjes së veprës, duke llogaritur edhe kohën e kaluar në paraburgim.

Arifi u akuzua se ka kërkuar ryshfet për shtrimin në spital të një personi në gjendje të rëndë shëndetësore, ndonëse kjo ishte detyrë e tij zyrtare, ndërsa Ameti u arrestua në flagrancë duke marrë 20 mijë euro, pjesë e shumës së destinuar për Arifin. Të dy të akuzuarit gjatë procesit gjyqësor kanë mohuar fajësinë.