Mëngjesi më i ftohtë sot është regjistruar në Kodër të Diellit, me -15 gradë Celsius. Siç informon DPHM, -14 gradë janë matur në Berovë, -12 në Mavrovë, Krushevë, Kriva Pallankë dhe Manastir, -11 në Pretor dhe Ohër, -10 në Shkup – Petrovec, Prilep, Tetovë, Demir Kapi, Veles, Shtip dhe Pozharan, -9 në Strumicë dhe Gjurishtë, -8 në Shkup – Zajçev Rid, Vinicë dhe Kavadar, ndërsa -4 gradë në Gjevgjeli.
Sipas parashikimit të DPHM-së, moti në ditën e parë të Vitit të Ri do të jetë i kthjellët dhe i ftohtë në mëngjes, ndërsa gjatë ditës kryesisht me diell. Do të fryjë erë e lehtë deri mesatare nga drejtimi jugperëndimor.
Temperatura minimale do të jetë në intervalin nga -13 deri në -5 gradë, ndërsa ajo maksimale do të arrijë nga -1 deri në 6 gradë.
Në Shkup sot moti do të jetë me diell dhe i ftohtë, me erë mesatare nga jugu. Temperatura maksimale do të arrijë 3 gradë.
Të premten moti do të jetë pjesërisht i vranët dhe i ftohtë, me temperatura minimale kudo nën zero. Në pjesët perëndimore do të ketë reshje të herëpashershme, kryesisht dëborë.
Më pas vijon një periudhë me mot pjesërisht të vranët dhe më të ngrohtë, me reshje të herëpashershme lokale shiu, ndërsa në male dëborë. Do të fryjë erë mesatare deri e fuqishme nga drejtimi jugor dhe temperaturat do të jenë në rritje.
