103 vjet raporte diplomatike me Shqipëri, Ambasada amerikane: Krenarë për partneritetin tonë!

Sot shënohet 103-vjetori i marrëdhënieve diplomatike mes SHBA dhe Shqipërisë.

Ambasada amerikane në Tiranë shprehet se SHBA është krenare për partneritetin e saj me Shqipërinë.

Në një postim në Facebook, ambasada ka ndarë disa pyetje në lidhje me momentet historike mes Amerikës dhe Shqipërisë, duke ftuar qytetarët t’i përgjigjen kuizit.

“Sot festojmë 103 vjet marrëdhënie diplomatike mes Shteteve të Bashkuara dhe Shqipërisë! Jemi krenarë për partneritetin tonë me Shqipërinë për të çuar përpara sigurinë, forcën dhe mirëqenien tonë të përbashkët. Mendon se i njeh momentet kyçe të historisë sonë të përbashkët? Shfleto për të bërë kuizin dhe shiko sa përgjigje të sakta gjen. Na trego rezultatin tënd në komente”, shkruan ambasada.

Marrëdhëniet diplomatike Shqipëri-SHBA janë vendosur më 28 korrik 1922, pak muaj pas përfundimit të Konferencës së Paqes në Paris, ku presidenti amerikan Wilson doli në krah të shqiptarëve.

Këto marrëdhënie patën një ndërprerje prej 52 vjetësh gjatë pushtimit italian dhe regjimit komunist për t’u rivendosur sërish më 15 mars 1991, me përmbysjen e regjimit dhe vendosjen e demokracisë.

Ambasadori i parë amerikan në Tiranë ishte Ulysses Grant Smith, i cili e nisi misionin diplomatik më 4 dhjetor 1922. Ndërsa William Rajerson u bë ambasadori i parë amerikan pas rivendosjes së këtyre marrëdhënieve në 1991.

Ambasadori i parë shqiptar në Uashington ishte Faik Konica, i cili u emërua në këtë detyrë në vitin 1929 nga Ahmet Zogu.

Zyrtari i parë i lartë i SHBA-së që vizitonte Shqipërinë, ishte sekretari amerikan i Shtetit James Baker në Tiranë më 21 qershor 1991, tre muaj pas rivendosjes së marrëdhënieve. Ndërsa presidenti i parë amerikan që vizitoi Shqipërinë ishte George W. Bush, më 10 qershor 2007.