Stadiumi “Wembley” është konfirmuar si nikoqirë i “Finalissimas” së parë pas 29 vitesh, ku më 1 qershor kampioni i Euro 2020, Italia, do të përballet me kampionin e CONMEBOL, Argjentinën.
Fillimisht, tifozët për këtë përballje janë njoftuar në shtator të vitit të kaluar, ndërsa në dhjetor u konfirmua që është nënshkruar një marrëveshje mes UEFA-s dhe CONMEBOL-it e cila do të zgjas deri më 30 qershor të vitit 2028, duke rënë dakord që ndeshja mes Italisë dhe Argjentinës të zhvillohet më 1 qershor të këtij viti, përcjell KosovaPress.
Ndeshja origjinale, e cila vendos përballë fituesin e fundit të Kampionatit Evropian dhe fituesin e fundit të Kupës së Amerikës, në të kaluarën ishte njohur si trofeu “Artemio Franchi dhe ishte zhvilluar nga viti 1985 deri në vitin 1993.
Në edicionin e parë të kësaj gare, respektivisht në vitin 1985, Franca e kishte mposhtur Uruguain me rezultat 2:0, kurse në ndeshjen e fundit e cila u zhvillua në vitin 1993, Argjentina e mposhti Danimarkën në penallti.
Siç ishte parashikuar, “Wembley” tani është konfirmuar si vendi ku do të mbahet kjo finale, stadium ky i cili ka një kapacitet prej 86,000 ulëseve.
