Turizmi mjekësor, një trend në rritje/ Më shumë të huaj zgjedhin Shqipërinë për të kryer ndërhyrje estetike

Në Shqipëri nuk e sjellin këmbët vetëm për turizëm, por, i beson asaj edhe anën estetike e shëndetësore. 25 vjeçarja italiane, Camila Lamberti prej një jave ndodhet në Tiranë, dhe ndryshe nga herët e tjera që ka ardhur për të shijuar bukuritë natyrore, kësaj here ndodhet në Shqipëri për një kontroll mjekësor, pasi ka kryer një ndërhyrje estetike në fytyrë.

“Jam Kamila, jam italiane, vij nga Roma! Vendosa ta bëj operacionin në Shqipëri  për një çështje ekonomike. Jam ndier shumë mirë, ishin shumë të besueshëm dhe shumë të shpejtë. U ndjeva shumë mire. E gjeta klinikën për ta bëra operacionin në Instagram. Pashë disa sugjerime të mira dhe vendosa ta bëj në këtë klinikë, pra në Shqipëri”, tha italiania Camilla Lamberti.

Sipas ekspertëve vitet e fundit është rritur ndjeshëm turizmi mjekësor në vendin tonë, kryesisht të huajt zgjedhin shërbimet dentare dhe ato estetike.

“Kemi një numër të shtuar rastesh që vijnë, shërbime të parimbursueshme nga shtetet e BE-së. Kryesishtë vijn për shërbime dentare, ose transplant për  mbjelljen e flokëve, ndërhyrje të hundës, veshëve, për ndonjë anomali tjetër të fytyrës, kemi pacientë që bëjnë lifting”, mjekja ORL, Klodiana Zaharia.

Ashtu si të huajt, edhe ekspertët pohojnë se Shqipërinë e zgjedhin për shkak të çmimeve të lira krahasuar me vendet fqinje.

“Bëjnë research e veta, shoh që janë pacientë që vijnë duke pyet njëri-tjetrin. Çmimet në Europë janë 4-5 herë më të mëdhaja, kështu që me një buxhet të vogël, shijojnë edhe kulinarinë, peisazhin dhe vendin”, tha mjekja ORL Klodiana Zaharia.

Në Shqipëri për turizëm mjekësor vijnë nga çdo cep i botës, por besnik mbetën italianët.

“Më shumë është jugu i Italisë, plotë raste nga Anglia, Rumania, dhe Spanjollët…”.