Ministri palestinez i Komunikimeve, Ishak Sidr, tha sot se të gjitha shërbimet e komunikimit dhe të internetit do të ndalojnë në Rripin e Gazës nga e enjtja për shkak të shterimit të karburantit, transmeton Anadolu.
Gjatë një konference për shtyp, ministri tha se mungesa e shërbimeve të komunikimit do të “thellojë katastrofën humanitare”, raporton agjencia zyrtare palestineze të lajmeve Wafa.
Kjo do të ndikojë në komunikimet midis Mbrojtjes Civile, Gjysmëhënës së Kuqe dhe organizatave të tjera humanitare, shtoi ai, duke vënë në dukje se “kjo do të thotë humbje e shumë jetëve”.
Duke i quajtur “këto veprime shkelje të së drejtës ndërkombëtare”, Sidr u bëri thirrje “të gjitha institucioneve ndërkombëtare, Unionit Ndërkombëtar të Telekomunikacionit në veçanti, UNRWA-së, Gjysmëhënës së Kuqe Arabe, Kryqit të Kuq, organeve të të drejtave të njeriut dhe organizatave të shoqërisë civile që të ndërhyjnë menjëherë në mënyrë që të sillet karburant në Rripin e Gazës”.
Izraeli ka kryer sulme të pamëshirshme ajrore dhe tokësore në Rripin e Gazës – duke përfshirë spitalet, rezidencat dhe objektet fetare – që nga sulmi ndërkufitar nga grupi i rezistencës palestineze Hamas më 7 tetor.
Të paktën 11.100 palestinezë janë vrarë, duke përfshirë 4.506 fëmijë dhe 3.027 gra. Ndërkohë, numri i të vdekurve izraelitë është rreth 1.200, sipas shifrave zyrtare.
