Pas paralajmërimeve për ç’kyçje të gazit për në Evropë nga Ukraina, zëdhënësi i qeverisë, Muhamet Hoxha, theksoi se nuk ka arsye për t’u shqetësuar, pasi Maqedonia e Veriut nuk furnizohet me gaz nga gazsjellësi i Ukrainës.
“Maqedonia e Veriut nuk furnizohet me gaz nga gazsjellësi që kalon nga Ukraina. Në atë drejtim duam të informojmë se sasitë që janë të nevojshme për vendin tonë, janë të siguruara nga kompanitë që bëjnë distribuimin e gazit në vendin tonë. Nuk ka nevojë për shqetësim nga mungesa e gazit.”,- deklaroi zëdhënësi i Qeverisë, Muhamet Hoxha.
Nga ana tjetër pas ndërprerjes së rrjedhës së gazit nëpër gazsjellësin e Ukrainës për në Evropë, sasitë e gazit rus të porositura nga blerësit evropianë më 11 maj ranë në 72 milionë metra kub, informoi zëdhënësi i “Gazprom”, Sergei Kupriyanov.
Kërkesat ranë me gati një të katërtën pasi një pjesë e gazit tranzit rus përmes Ukrainës u ndërpre në stacionin “Soranovka”.
Një ditë më parë porositë e kompanive evropiane ishin në 95.8 milionë metër kub.
