Politizim të një çështje të drejtësisë shqiptare. Kështu e ka cilësuar kryeministri Rama protestën e zhvilluar ku kërkohej lirimi i kryebashkiakut të zgjedhur të Himarës, Fredi Beleri, i cili ndodhet në burg për blerje votash.
Sipas tij është e papranueshme që të zgjedhurit e një shteti demokratik organizojnë protestë në një shtet tjetër demokratik, kundër autoriteteve të këtij shteti.
“Po kush dhe si mund ta lirojë sot nga burgu një qytetar shqiptar me kombësi greke, i cili si kandidat për kryetar bashkie, akuzohet nga Prokuroria e Posaçme kundër Korrupsionit e Krimit të Organizuar, se ka kryer krimin e blerjes së votave – për të cilin Kodi Penal i Shqipërisë është i qartë dhe drastik – ndërsa sipas vendimit të pandryshuar në të treja shkallët e gjykimit, nuk mund ta lerë paraburgimin deri në fund të procesit gjyqësor ndaj tij?! Vallë kombësia greke i jep qytetarit shqiptar të akuzuar nga SPAK-u dhe mbajtur në paraburgim nga gjykatat e vendit, një status të ndryshëm nga 48 qytetarë të tjerë shqiptarë me kombësi shqiptare, ndër të cilët edhe disa kryebashkiakë të partisë time, që sot janë të paraburgosur nën akuzat e të njëjtit organ, me vendime identike të të njëjtave gjykata?!” – shkroi Rama.
Kryeministri iu drejtua dhe homologut grek Mitsotakis në opinionin e tij të shkruar në faqen e tij zyrtare në Facebook. Krah kënaqësisë për progresin e përbashkët në shkrirjen e akujve ballkanik dhe zgjidhjen e ngërçeve, Rama shkruan se është i keqardhur dhe i shqetësuar që kjo çështje e trajtuar nga drejtësia për akuzën e krimit elektoral po kthehet në një çështje të të drejtave të minoritetit grek.
“Ngado që rrotullohem për t’u futur “në këpucët e tjetrit”, unë nuk e gjej dot një rrugë që më nxjerr në shtegun e justifikimit të kësaj qasjeje ndaj një çështjeje të drejtësisë dhe nuk e kuptoj dot, se si mund të zgjidhet ky hall “i çuditshëm” i fqinjëve dhe miqve tanë, përveçse duke e lënë drejtësinë të bëjë e patrazuar punën e saj,” – u shpreh Rama.
