Gjatë të premtes, është rrëmbyer kryetari i komunës së Melitopolit nga forcat ruse.
Siç bëhet e ditur, ky rrëmbim ka ndodhur pasi Ivan Fedorov ka refuzuar që të bashkëpunojë me armikun, transmeton “Bota sot”.
Pas kësaj ngjarje, ka reaguar presidenti i Ukrainës, Volodymyr Zelensky, ku e ka konfirmuar rrëmbimin e kryetarit të komunës së Melitopolit.
Zelensky e ka quajtur rrëmbimin një “krim kundër demokracisë” dhe e ka cilësuar këtë veprim të Rusisë si “terrorizëm”.
“Rrëmbimi i kryetarit të Melitopolit është një krim. Është një krim kundër vetë demokracisë… Veprat e pushtuesve rusë do të konsiderohen si ato të terroristëve të Shtetit Islamik”, ka thënë Zelensky.
Deri më tani nuk ka ndonjë reagim nga ana e rusëve, shkruan Mirror.
Ndërkaq, në videon e publikuar shihen momenti kur disa ushtarë të Rusisë e nxjerrin Fedorov nga një ndërtesë.
Këto pamje të cilat janë publikuar nga mediat në Ukrainë, besohet se janë xhiruar në sheshin e qytetit i cili quhet “Victory”( apo në gjuhe shqipe “Sheshi i Fitores”).
Lidhur me rrëmbimin kanë reaguar edhe deputetët e Parlamentit të Ukrainës, ku kanë thënë se Fedorov është rrëmbyer nga dhjetë ushtarë rus.
Po ashtu, kanë thënë se gjatë rrëmbimit të Fedorov rusët i kanë vendosur një qese në kokë.
