Kalimi kufitar Rafah është vendosur të hapet nesër për të lejuar palestinezët e plagosur të trajtohen në spitalet e Egjiptit, raporton Anadolu.
Drejtori për media i pikës kufitare Rafah, Wael Abu Mohsen, për Anadolu ka konfirmuar se kalimi do të jetë i hapur.
Guvernatori i Sinait Verior, Mohamed Shosha, konfirmoi hapjen e pikës kufitare në një deklaratë televizive për një kanal egjiptian.
Ai tha se Sinai Verior është në gatishmëri për të pritur palestinezët e plagosur sapo të hapet kalimi kufitar.
Kalimi kufitar Rafah është mbyllur që nga shpërthimi i luftimeve në Rripin e Gazës më 7 tetor dhe ishte pjesërisht i hapur për disa ditë për të lejuar hyrjen e vetëm një numri të kufizuar kamionësh me ndihma.
Abu Mohsen njoftoi se vetëm 196 kamionë me ndihma kanë kaluar deri më tani në Gaza që nga 7 tetori.
Ushtria izraelite ka zgjeruar sulmet e saj ajrore dhe tokësore në Rripin e Gazës, e cila ka qenë nën sulme të pamëshirshme ajrore që nga ofensiva e befasishme e Hamasit e kryer në fillim të këtij muaji.
Më shumë se 10 mijë njerëz janë vrarë në konflikt, duke përfshirë të paktën 8.525 palestinezë dhe mbi 1.538 izraelitë.
Kryeministri izraelit, Benjamin Netanyahu, ka hedhur poshtë thirrjet në rritje për një armëpushim, duke theksuar se kjo do të ishte një “dorëzim” ndaj Hamasit.
