Ministri turk i Mbrojtjes Kombëtare Hulusi Akar dhe homologu i tij kroat Mario Banozhiq diskutuan sot çështjet dypalëshe të mbrojtjes dhe sigurisë, si dhe zhvillimet rajonale, raporton Anadolu.
“Takimet tona kanë qenë jashtëzakonisht produktive dhe konstruktive. Ne jemi të kënaqur që shohim se jemi dakord për shumë çështje”, tha Akar në një konferencë shtypi me Banozhiqin në kryeqytetin Ankara.
Vizita e Banozhiqit në Türkiye është e para e një ministri kroat të mbrojtjes në nëntë vjet, e cila erdhi pas dy tërmeteve të forta që goditën Türkiyen jugore më 6 shkurt, që shkaktuan vdekjen e më shumë se 45 mijë njerëzve.
Akar tha se Kroacia ishte midis 91 vendeve që mbështetën Türkiyen pas tërmeteve, duke shtuar: “Do të doja të falënderoja qeverinë kroate, popullin e saj, ministrin dhe vendet e tjera për mbështetjen dhe kontributet e tyre dhe shpreh mirënjohjen tonë”.
Shefat e mbrojtjes ranë dakord se bashkëpunimi midis Ankarasë dhe Zagrebit si pjesë e NATO-s do të japë kontribute “të rëndësishme” si për aleancën, ashtu edhe për rajonin, tha Akar.
“Ne theksuam edhe një herë se takimet e dialogut ushtarak janë shumë të rëndësishme në drejtim të ndërmarrjes së hapave konkretë. Ne ramë dakord reciprokisht për takimin e delegacioneve ushtarake në rastin më të hershëm”, shtoi ai.
Banozhiq, nga ana e tij, tha se kishte një takim “shumë konstruktiv” me ministrin Akar.
“Kroacia tregon ndjeshmëri të madhe për vazhdimin e marrëdhënieve të saj shumë të mira me Türkiyen”, tha ai.
Ministrat shkëmbyen gjithashtu pikëpamje mbi luftën kundër terrorizmit dhe luftën Rusi-Ukrainë.
