Zv/kryeministri i parë Izet Mexhiti gjatë takimit me ambasadoren e SHBA-së në Shkup, Angela Ageler ka theksuar përkushtimin në luftën e pakompromis kundër korrupsionit dhe anëtarësimin e vendit në BE.
“Lufta kundër korrupsionit dhe përparimi drejt integrimit evropian nuk kanë alternativë. Ky ishte mesazhi që përcolla sot në një takim të rëndësishëm me ambasadoren e ShBA-së në Maqedoninë e Veriut, znj. Angela Aggeler, një aleate dhe mike e madhe e vendit tonë”, ka shkruar Mexhiti në Facebook.
Në takim është diskutuar gjerësisht për thellimin e partneritetit strategjik mes të dyja vendeve, mbështetjen e vazhdueshme të ShBA-së për reformat në drejtësi dhe përpjekjet e Qeverisë në luftën kundër korrupsionit dhe krimit të organizuar.
“E ritheksova përkushtimin e Qeverisë për procesin eurointegrues dhe për rëndësinë e bashkëpunimit të ngushtë në kuadër të NATO-s, si garanci për siguri, stabilitet dhe zhvillim. Biseduam gjithashtu për projektet madhore infrastrukturore, përfshirë ndërtimin e korridoreve 8 dhe 10d, që janë thelbësore për rritjen ekonomike dhe lidhjen e qëndrueshme rajonale”, ka shkruar Mexhiti.
Takimi është zhvillua në një atmosferë miqësore e konstruktive, duke rikonfirmuar vullnetin e përbashkët për një bashkëpunim të thelluar dhe afatgjatë me Shtetet e Bashkuara.
Burimi: alfax.mk
