Meksika do ta çojë Google në gjyq nëse hartat që u shfaqen përdoruesve në SHBA vazhdojnë të etiketojnë Gjirin e Meksikës si “Gjiri i Amerikës” në të gjithë trupin e ujit, tha të hënën presidentja Claudia Sheinbaum, duke argumentuar se urdhri i Presidentit të SHBA, Donald Trump, për ta ndryshuar emrin vlen vetëm për pjesën e raftit kontinental nën kontrollin e SHBA.
“Ajo që po bën Google këtu është të ndryshojë emrin e raftit kontinental të Meksikës dhe Kubës, që nuk ka lidhje me dekretin e Trump, i cili vlejti vetëm për raftin kontinental të SHBA”, shprehu Sheinbaum. “Ne nuk jemi dakord me këtë, dhe Ministria e Jashtme ka dërguar një letër të re që adreson këtë çështje”.
Sheinbaum ceku se ndryshimi i emrit është “i gabuar”, duke shtuar se dekreti i Trump “ndryshoi emrin brenda raftit të tij kontinental, i cili shtrihet 22 milje detare nga bregu i SHBA—jo në të gjithë gjirin”.
Sheinbaum tha se Meksika tani po dërgon një letër të re në Google, e cila thotë se “çdo referencë ndaj nismës ‘Gjiri i Amerikës’ në platformën tuaj Google Maps duhet të kufizohet striktisht në zonën detare nën juridiksionin e SHBA”.
“Çdo zgjerim përtej kësaj zone kalon autoritetin e çdo qeverie kombëtare ose entiteti privat. Nëse kjo ndodh, qeveria e Meksikës do të marrë masat e nevojshme ligjore siç e sheh të arsyeshme”, shtohej në letër.
Sheinbaum theksoi se Meksika do të presë përgjigjen e Google përpara se të vazhdojë me veprime ligjore, shkruan CNN.
Burimi: botasot.info
