Presidenti kolumbian, Gustavo Petro, dhe ai kilian, Gabriel Boric, kanë tërhequr për konsultime ambasadorët e tyre në Tel Aviv për shkak të sulmeve të vazhdueshme izraelite në Gaza, raporton Anadolu.
Gustavo Petro ka reaguar në rrjetin social X për masakrat izraelite ndaj popullit palestinez:
“Kam vendosur të tërheq ambasadorin tonë në Izrael për konsultime. Nëse Izraeli nuk i ndal masakrat e tij ndaj popullit palestinez, ne nuk mund të qëndrojmë atje”, u shpreh ai.
Presidenti kilian Gabriel Boric tha se Izraeli ka shkelur ligjin ndërkombëtar të të drejtave të njeriut në Rripin e Gazës dhe se ai e ftoi ambasadorin kilian në Tel Aviv të kthehet në vend për konsultime.
“Kili i dënon fuqishëm operacionet e tilla ushtarake dhe i ndjek me shqetësim ato”, tha Boric.
Në deklaratën e tij më 19 tetor, presidenti kilian tha: “Dua të them se asgjë nuk mund të justifikojë barbarizmin e Izraelit në Gaza përballë sulmeve të papranueshme të kryera nga Hamasi”.
Zëdhënësja e presidentit të Bolivisë, Maria Nela Prada dhe zv/ministri i Punëve të Jashtme, Freddy Mamani, ditëve të fundit në një konferencë të përbashkët për media njoftuan se kishin vendosur të ndërpresin marrëdhëniet diplomatike me Izraelin.
