Jazidët e Irakut rivarrosin viktimat e masakrës së IS-it

Komuniteti jazidi në Irakun verior ka kthyer mbetjet mortore të 104 personave të cilët u vranë nga grupi militant, i ashtuquajtur Shteti Islamik (IS) më 2014.

Rivarrimi u bë në fshatin Koço afët malit Sinjar në provincën Ninevah. Eshtrat e tyre ishin identifikuar dhe zhvarrosur nga varret masive, transmeton BBC.

Mijëra burra u vranë kur IS pushtoi vendlindjen e komunitetit jazidi. Gratë dhe fëmijët u skllavëruan dhe u përdhunuan. Kombet e Bashkuara kanë thënë se IS ka kryer gjenocid ndaj këtij komuniteti.

Të gjitha viktimat që u rivarrosen ishin burra të vrarë nga militantët në muajin gusht të vitit 2014, tha kreu i Organizatës për Dokumentim, Khairi Ali Ibrahim.

Një përkujtim u mbajt për ta në memorialin e Ushtarit të Panjohur në Bagdad para se të silleshin në shtëpi në Koço.

Image

Ceremonia e rivarrimit të jazidëve të vrarë nga grupi terrotist Shteti Islamik. Irak, 6 shkurt 2021.

“Ky është hap drejt drejtësisë tranzicionale. Edhe viktimat e tjera, gratë, fëmijët, të cilët mbijetuan gjenocidin do të kompensohen”, tha aktivistja jazide për të drejtat e njeriut, Mirza Dinnayi.

“Shpresoj se ne mund të bëjmë shumë më tepër në mbrojtjen e jazidëve”, tha ajo.

Image

Disa persona mbajnë një arkivol me mbetjet mortore të jazidëve të vrarë nga grupi IS.

Para se IS ta pushtonte Irakut më 2014, besohej se aty jetonin rreth 550.000 jazidë. Rreth 360.000 prej tyre shpëtuan dhe gjetën strehim diku tjetër.

Organizata Amnesty International ka thënë se rreth 2.000 fëmijë jazidi që kishin mbijetuar nga robëria brutale e IS-it ende nuk po marrin kujdesin e duhur dhe po vuajnë nga probleme të rënda shëndetësore fizike dhe mendore.

Jazidët besojnë në një Zot dhe teologjia e tyre kryesisht buron nga traditat e lashta fetare iraniane, e jo nga tekstet kanonike hebreje, të krishtera apo myslimane./REL

Ngjarja paraprake

Disa produkte bukurie që dermatologët rekomandojnë të mos shpenzoni para në to

Ngjarja e ardhëshme

“Ata që i fryjnë zjarrit të detit me Greqinë janë maskarenj”, shpërthen Rama, akuza partive në Shqipëri e Kosovë

të fundit nga

AlbanianEnglishMacedonian