Ministri i Punëve të Jashtme i Iranit, Hossein Amir-Abdollahian, ka deklaruar se vendi i tij është i gatshëm të rifillojë lidhjet diplomatike me Arabinë Saudite “kur Riadi të jetë i gatshëm”, transmeton Anadolu Agency (AA).
Në Forumin e Dialogut të mbajtur në Teheran, ministri Amir-Abdollahian tha se Irani është i gatshëm të “rifillojë lidhjet diplomatike me Riadin dhe të rihapë ambasadat”.
Shefi i diplomacisë iraniane tha se është gati të zhvillojë një takim të përbashkët me homologët e tij nga vendet e Gjirit në margjinat e një samiti rajonal për Irakun, që do të mbahet nesër në kryeqytetin jordanez Amman.
Në samitin në Amman do të marrin pjesë Irani, Iraku, Arabia Saudite, Katari, Emiratet e Bashkuara Arabe, Egjipti, Franca, si dhe Bahreini dhe Omani, të cilët do të marrin pjesë si të ftuar.
Irani dhe Arabia Saudite ndërprenë marrëdhëniet e tyre diplomatike pasi misionet diplomatike saudite u sulmuan nga turma të zemëruara në janar të vitit 2016 pas ekzekutimit të klerikut shiit saudit, Sheik Nimr al-Nimr.
Muajt e fundit, dy rivalët rajonal janë angazhuar në negociata, të ndërmjetësuara nga Bagdadi, në një përpjekje për të rivendosur lidhjet e tyre.
Raundet e fundit të bisedimeve kanë zbutur tensionet, me ministrin Amir-Abdollahian në muajin korrik që la të kuptohet se bisedimet do të avancojnë nga niveli i sigurisë në atë politik.
