Futbollisti kampion, Valentin Koçoski ka gjetur skuadrën e tij të re, ku do të vazhdojë karrierën e tij.
Pas shkëputjes së kontratës me Struga Trim Lum, futbollisti nga Ohri, siç mëson “infOSport.mk”, i ka thënë “PO” skuadrës së Voska Sport, te e cila skuadër pritet të prezantohet pasditën e sotme.
Koçoski për dy vite të plota ishte pjesë e Struga Trim Lum, me të cilën skuadër edicionin e kaluar u shpall kampion, ndërsa gjithashtu kishte qenë pjesë e skuadrës strugane edhe më parë, kur kjo skuadër për herë të parë në vitin 2021 kishte luajtur në Europë.
Ndryshe Koçoski në Ligën e Parë numëron 147 ndeshje, ndërsa me eksperiencën e tij pritet të ndihmojë skuadrën e Voska Sport, që këtë vit po debuton në mesin e më të mirëve në futbollin maqedonas.
