2 Korriku i Prishtinës është para sprovës së radhës, do të takohet me Ferizajn. Skuadra prishtinase kërkon pikë dhe të ruajë hapin për dy vendet e para.
2 Korriku aktualisht renditet në vend të tretë me 28 pikë, ka 6 më pak se lideri Ferizaj dhe 5 se Vushtrria.
Të premten e kësaj jave, 2 Korriku luan në konak të Ferizajt, duke filluar në orën 13.00.
“Kryendeshja e javës së tetëmbëdhjetë, javë kjo që është e fundit e fazës së dytë, do të jetë ajo ndërmjet skuadrës lidere të Ferizajt si dhe skuadrës së 2 Korrikut, që zë vendin e tretë në tabelë.
Për skuadrat që mes vete kanë gjashtë pikë diferencë në renditjen tabelare, kjo do të jetë hera e dytë që ndeshen mes vete në këtë edicion, me përballjen e parë që mbyllej me fitoren e ferizajasve.
Si 2 Korriku, ashtu edhe Ferizaj, në këtë xhiro vijnë nga fitoret e arritura në xhiron e fundit. “Verdheblutë” mposhtën Vllazninë në shtëpi, me rezultat 1:0, e skuadra ferizajase, po me të njëjtin rezultat, triumfoi në Hogosht përballë Kikës.
Përballja e së premtes që po vije, e që do zhvillohet në stadiumin me bar sintetik prapa sallës së sportit në Ferizaj do të zë vend në ekranet e platformës “Artmotion”, më saktësisht në kanalin “ArtSport”, nga ku shikuesit do të kenë mundësinë që ta shijojnë e shikojnë duelin ndërmjet Ferizajt dhe 2 Korrikut”, thuhet në njoftimin e 2 Korrikut.
