Momenti i shumëpritur ka ardhur. Sot është dita e gjysmëfinaleve në Final 4 të Ligës Unike në konkurrencën e femrave.
Ky është edicioni i parë dhe historik i Ligës Unike te femrat dhe katër skuadra garojnë për trofeun e çmuar.
Final 4 mbahet në Prishtinë më 23 dhe 24 Mars, ndërsa hyrja është falas për adhuruesit e basketbollit.
Sfida e parë gjysmëfinaleve zhvillohet ndërmjet Penzës dhe Bashkimit. Skuadra pejane përfundoi garat e rregullta me tetë fitore dhe dy humbje, ndërsa ajo prizrenase me pesë fitore e pesë humbje.
Kampionet e Kosovës që gjithashtu kanë fituar Superkupën Mbarëkombëtare, duan trofeun e parë të Ligës Unike, ndërsa skuadra prizrenase, pasi fitoi Kupën e Kosovës shpreson të fitojë edhe trofeun e parë të Ligës Unike.
Takimi i dytë gjysmëfinal zhvillohet mes Prishtinës dhe Flamurtarit, dy skuadra që në dhjetë ndeshje, kishin nga shtatë fitore e tri humbje, si dhe nga një fitore ndaj njëra-tjetrës në garat e rregullta, duke e bërë sfidën rivalizuese dhe të paparashikueshme. Klubi bardhekaltër që është organizator i Final 4, ka synim të fitojë titullin, ashtu si edhe skuadra vlonjate.
Orari
23 Mars
16:00 Penza-Bashkimi
19:00 Prishtina-Flamurtari
24 Mars
16:00 Ndeshja për vendin e tretë
19:00 Finalja
