Biden zotohet se do të shtojë vaksinimet antiCOVID në SHBA

Presidenti i zgjedhur, Joe Biden thotë se do të tregohet më agresiv në luftën kundër COVID-19, duke shtuar ndër të tjera ritmet e vaksinimit, ndërsa administrata e Presidentit Trump po iu kundërpërgjigjet kritikave lidhur me reagimin ndaj pandemisë që ka lënë deri tani afro 339,000 të vdekur në SHBA, shkruan Gazeta Sinjali.

Në vend janë regjistruar disa përmirësime ditët e fundit, krahasuar me kulmin e infeksioneve të reja në një periudhë dy-mujore, por ende identifikohen rreth 180,000 raste të reja çdo ditë dhe zyrtarët e shëndetësisë paralajmërojnë se udhëtimet dhe grumbullimet për festat mund t’i rrisin përsëri ritmet e infeksioneve.

Mbetet më pak se një muaj deri kur Joe Biden të bëjë betimin
si presidenti i ri amerikan. Të martën ai tha pas një seance informimi me
ekspertë se administrata e Presidentit Trump po mbetet shumë prapa në
përpjekjet e vaksinimit.

Biden ka deklaruar si synim 100 milionë vaksinime në 100
ditët e tij të para si president. Operacioni Shpejtësia Marramendëse i
administratës aktuale kishte parashikuar vaksinimin e 20 milionë amerikanëve
deri në fund të dhjetorit.

Të dhënat e fundit të Qendrës për Kontrollin dhe
Parandalimin e Sëmundjeve tregojnë se 2.1 milionë vetë kanë marrë dozën e parë
nga dy doza të nevojshme të vaksinës.

“Afro 20 milionë doza të para janë veçuar për shtetet me
synimin që të dërgohen dhe të bëhen menjëherë. Procesi po ecën me shpejtësi,”
tha sekretarja e shtypit e Shtëpisë së Bardhë, Kayleigh McEnany përmes një
deklarate të martën në mbrëmje.

“Kritikët partiakë ofrojnë thjesht retorika boshe që të
trembin amerikanët për qëllime politike, por Presidenti Trump po ofron
rezultate”.

Biden tha se tani që ekziston vaksina, ai ka besim se vendi
do të kthehet në normalitet por jo menjëherë.

“Javët dhe muajt e ardhshëm do të jenë shumë të vështirë për
vendin tonë, ndoshta më të vështirat e kësaj pandemie,” tha ai.

Dr. Anthony Fauci, drejtor i Institutit për Alergjitë dhe
Sëmundjet Infektive tha për rrjetin CNN se fakti që raportohen dhjetëra mijëra
raste të reja me koronavirus çdo ditë tregon se sëmundja “ka dalë jashtë
kontrollit në çdo aspekt”.

Ai tha se numri i të sëmurëve në janar mund të kalojë
shifrat e dhjetorit.

“Duhet të parashikojmë se do të bëhet më keq” tha Dr. Fauci,
pasi miliona amerikanë kanë udhëtuar për të vizituar të afërm dhe miq për
Krishtlindje dhe do të udhëtojnë për Vit të Ri, duke përhapur më shumë virusin.

Më herët të martën, Nënpresidentja e zgjedhur amerikane,
Kamala Harris dhe bashkëshorti i saj Doug Emhoff bënë dozat e para të vaksinës
së koronavirusit.

Harris, me origjinë afrikano-amerikane dhe
indiano-amerikane, u vaksinua në një qendër mjekësore që u shërben kryesisht
afrikano-amerikanëve, duke kthyer vëmendjen para kamerave televizive tek
pakicat, të cilat janë goditur në mënyrë disproporcionale nga koronavirusi, në
mënyrë që ata të bëjnë vaksinën.

Presidenti i zgjedhur demokrat Joe Biden, i cili do të marrë
detyrën më 20 janar mori dozën e parë të vaksinës kundër COVID-19 javën e
kaluar.

Presidenti Trump është këshilluar ta shtyjë për më vonë
vaksinimin, pasi ai u mjekua me antitrupa monoklonale gjatë shtrimit në spital
me COVID-19.

Dr. Fauci tha se Biden, “përmes udhëheqjes së tij nga lart”,
mund të ketë një ndikim në luftimin e virusit, një koment që mund të shihet si
një kritikë indirekte ndaj Presidentit në largim Donald Trump, i cili shpesh ka
nënvlerësuar ndikimin e koronavirusit dhe nuk ka dalë shpesh në publik që nga
koha kur ai humbi zgjedhjet muajin e kaluar.

“Ai po thotë të vëmë maskat të paktën për 100 ditë, të
gjithë, çdo person, dhe të lëmë mënjanë deklaratat politike mbi përdorimin e maskës”,
tha Dr. Fauci për Biden.

“Ne e dimë se çfarë funksionon. Ne e dimë që distancimi
fizik është i efektshëm. Ne e dimë që shmangia e turmave është e efektshme. Për
hir të së mirës, le ta bëjmë këtë të gjithë dhe do të shihni se kurba do të
ulet.”

Në Kolorado, zyrtarët shtetërorë të shëndetësisë thanë se
një djalë në të 20-at, i cili nuk ka bërë udhëtime kohët e fundit, ka rezultuar
pozitiv për variantin e ri të koronavirusit të zbuluar për herë të parë në
Britani. Ky është rasti i parë i identifikuar në SHBA.

Shkencëtarët në Britani besojnë se varianti i ri i virusit
është më ngjitës sesa llojet e identifikuara më parë të SARS-CoV-2.

Vaksinat që jepen tani mendohet të jenë efektive kundër
variantit të ri të COVID-19, thanë zyrtarët shëndetësorë të Kolorados në një
njoftim për shtyp. Zbulimi i variantit të ri detyroi Qendrën për Kontrollin e
Sëmundjeve të nxjerrë rregulla të reja në Ditën e Krishtlindjes për udhëtarët
që mbërrijnë në Shtetet e Bashkuara nga Britania, duke kërkuar që ata të
tregojnë prova të një testi negativ të COVID-19.

Po të martën, Luke Letlow, një republikan që pritej të bënte
betimin në janar si anëtar i ri i Dhomës së Përfaqësuesve pasi fitoi zgjedhjet
në nëntor, vdiq nga komplikacionet e shkaktuara nga COVID-19.

Politikani 41-vjeçar u shtrua në spital më 19 dhjetor pasi
rezultoi pozitiv për COVID-19.

“Na dhemb zemra tani që kemi mësuar lajmin e vdekjes së
ligjvënësit të zgjedhur, Luke Letlow,” tha kreu i republikanëve në Dhomën e
Përfaqësuesve, Kevin McCarthy.

Kryetarja e Dhomës së Përfaqësuesve, Nancy Pelosi tha përmes një deklarate se Dhoma mban zi për ligjvënësin e zgjedhur dhe se “dhimbja jonë bëhet edhe më e rëndë nga pasha e vuajtjeve të kaq shumë familjeve që kanë humbur njerëz të dashur nga ku virus i tmerrshëm”.

/Gazeta Sinjali/

Ngjarja paraprake

Çudit vëllai i Atdheut: Nuk ka kimi me Sindin!/ Atdheu: Nuk i dihet, është ende fillimi…

Ngjarja e ardhëshme

Rrëzohet një helikopter në Japoni, humb jetën piloti

të fundit nga

AlbanianEnglishMacedonian