Presidenti amerikan Joe Biden ka thënë të premten se nuk është i alarmuar pas takimeve midis presidentit kinez Xi Jinping dhe presidentit rus Vladimir Putin, të zhvilluara në Moskë.
Duke komentuar takimet, sipas CNN, Biden është shprehur duke thënë se, “ne jemi ata që zgjerojmë aleancat”.
“Shiko, unë nuk e marr lehtë Kinën. Nuk e marr lehtë Rusinë, por mendoj se ne e ekzagjerojmë shumë atë,”- raportohet se ka thënë Biden gjatë një konference për shtyp të mbajtur në Otava, Kanada.
Bëhet e ditur se presidenti po ashtu ka vënë në dukje se ndërsa zyrtarët amerikanë kanë paralajmëruar kohët e fundit për shenjat se Kina mund të konsiderojë rritjen e mbështetjes së saj ushtarake për Rusinë, “ata nuk e kanë bërë ende”.
“Nuk do të thotë se nuk do ta bëjnë, por nuk e kanë bërë ende. Dhe nëse ka ndodhur ndonjë gjë, Perëndimi është bashkuar dukshëm më shumë,”- është shprehur më tej ai.
Biden ka vazhduar fjalimin e tij duke përmendur rritjen e bashkëpunimit midis aleancave, përfshirë G7, aleancën Quad, ASEAN dhe AUKUS, si dhe ka bërë të ditur se deri më tani është takuar me 80% të liderëve në botë.
“Pra, unë thjesht dua ta vë në perspektivë, nuk e marr lehtë … atë që po bëjnë Kina dhe Rusia dhe mund të përkeqësohet ndjeshëm. Por le ta vëmë në perspektivë. Ne jemi koalicione të bashkuara – ne, ne Shtetet e Bashkuara dhe Kanadaja,”– ka përfunduar Biden.
