Policia austriake thotë se ka gjetur tetë emigrantë në kushte kërcënuese për jetën, të fshehur brenda një kutie të ngushtë prej druri, e cila ishte ngjitur në pjesën e poshtme të një kamioni.
Policia tha se njerëzit nga Turqia ishin trafikuar nga Rumania përmes Hungarisë në Austri, shkruan Euronews.
Disa prej tyre vuajtën nga hipotermia gjatë udhëtimit në temperatura të ulëta dhe disave u kishte rënë të fikët sepse ishin të ekspozuar ndaj tymrave të shkarkimit të kamionit për orë të tëra, tha policia në një deklaratë të mërkurën.
Emigrantët e përshkruan vendin e tyre të fshehur si një “kuti tmerri”, tha policia.
Shoferi i kamionit, një 39-vjeçar turk, u arrestua së bashku me një 56-vjeçar të dyshuar si bashkëpunëtor. Ata nuk dhanë detaje të mëtejshme për trafikantët apo emigrantët.
Hetuesit austriakë zbuluan pasagjerët e fshehur dhe arrestuan shoferin e kamionit muajin e kaluar në një stacion autostrade pranë Schwechat, në juglindje të Vjenës, pasi ata u informuan nga autoritetet gjermane. Bashkëpunëtori i dyshuar, i cili gjithashtu është turk, u arrestua të premten në qytetin austriak të Grazit, ku jeton.
Autoritetet e publikuan incidentin vetëm të mërkurën. Ata thanë se shoferi rrëfeu se kishte kontrabanduar deri në 40 emigrantë në Austri në tetë udhëtime. Çdo person duhej të paguante nga 15,000 deri në 16,000 euro për udhëtimin e rrezikshëm.
“Ky rast tregon edhe një herë se si veprojnë kriminelët e organizuar të trafikimit çnjerëzor,” tha ministri i Brendshëm austriak, Gerhard Karner.
“Ne duhet të sigurojmë që një mbrojtje e fortë e kufijve të jashtëm të BE-së t’i privojë këta kriminelë nga baza e tyre e biznesit.”
