Shtëpitë më të mëdha mediatike të vendeve perëndimore janë dhënë pas një përpjekjeje të pabesueshme dhe të paturpshme për të fshehur masakrën ndaj palestinezëve nga vëmendja e publikut botëror. Historia nuk do ta falë kurrë këtë hipokrizi, këtë të keqe që lëndon dhe dëshpëron ndërgjegjen e mbarë njerëzimit, tha shefi i Drejtorisë së Komunikimeve i Presidencës së Republikës së Türkiyes, Fahrettin Altun.
“Kur të vijë koha, kjo e keqe dhe shkaqet e kësaj të keqeje do t’u zbulohen shtypësve dhe atyre që heshtin përballë shtypjes si burim turpi”, vuri në dukje Altun gjatë Samitit Mediatik të Agjencive Turke të Lajmeve: “Uniteti dhe Vizioni i së Ardhmes në Media”, organizuar nga Anadolu.
Ai shprehu dëshirën që samiti të forcojë më tej lidhjet e vëllazërisë dhe të jetë i dobishëm për rajonin dhe botën.
Altun kujtoi se bashkimi, i cili në Samitin e Istanbulit të mbajtur në vitin 2021 u emërua “Organizata e Vendeve Turke (TDT)”, luajti një rol të rëndësishëm në thellimin e marrëdhënieve dypalëshe dhe ruajtjen e vëllazërisë mes vendeve turke.
Duke thënë se në takimin e organizuar në Istambul në maj të vitit 2022 u vendos Forumi Mediatik TDT të bëhet i përhershëm, Altun tha: “Në këtë kontekst, ne morëm një vendim për krijimin e Asociacionit të Agjencive të Lajmeve të Vendeve Turke dhe arritëm një marrëveshje për të mbajtur takimin e parë në Istanbul”.
Ai shpreson se ky samit do të jetë një pikë kthese që tregon se çfarë mund të bëhet në këtë fushë në të ardhmen e afërt.
Duke theksuar se sot prania e fortë në fushën e komunikimit, medias dhe informacionit nuk është një zgjedhje, por një detyrim, Altun vuri në dukje se sot vendet e botës turke, veçanërisht Turkiye, përballen dhe luftojnë kundër shumë nismave shkatërruese, nga islamofobia deri te fjala e urrejtjes, nga terrorizmi te racizmi.
Altun theksoi se vendet që nuk mund të menaxhojnë siç duhet proceset e tyre të komunikimit në luftën kundër problemeve dhe sfidave në fjalë, mund të mbeten të paaftë për të mbrojtur tezat e tyre në sytë e opinionit ndërkombëtar edhe për shumë çështje ku ata kanë të drejtë.
Gjatë fjalimit, ai preku qëndrimin e Izraelit gjatë sulmeve të tij në Gaza, i cili shpërfill të drejtat e njeriut dhe përbën një krim lufte.
Duke thënë se Turkiye po përpiqet të bëjë të gjitha përpjekjet e saj si në iniciativat diplomatike, ashtu edhe në fushën e komunikimit, Altun tha: “Turkiye, së bashku me të gjitha institucionet tona që punojnë në fushën e komunikimit dhe medias, është në anën e së vërtetës dhe drejtësisë, veçanërisht kundër transmetimit të njëanshëm të organeve mediatike perëndimore, që pothuajse po marrin udhëzime nga ushtria izraelite”.
Ai rikujtoi se 46 gazetarë u vranë në sulmet izraelite në Gaza.
“Me sulmet që kryen, Izraeli as gazetarëve nuk u jep të drejtën të jetojnë, e lëre më të zbulojnë dhe të shprehin të vërtetën. Me pikëllim të thellë dua të shpreh se fatkeqësisht kameramanit të Anadolus sonë në Gaza, Muhammed al-Alulu, iu vranë katër fëmijë në një nga këto sulme mbrëmë”, tha Altun.
Ai preku edhe mbulimin e mediave të huaja në Gaza.
“Shtëpitë më të mëdha mediatike të vendeve perëndimore janë dhënë pas një përpjekje të pabesueshme dhe të paturpshme për të fshehur këtë masakër nga vëmendja e publikut botëror. Historia nuk do ta falë kurrë këtë hipokrizi, këtë të keqe që lëndon dhe dëshpëron ndërgjegjen e gjithë njerëzimit. Kur të vijë koha, kjo e keqe dhe shkaqet e kësaj të keqeje do t’u zbulohen shtypësve dhe atyre që heshtin përballë shtypjes si burim turpi”, tha Altun.
Ai beson se mediat perëndimore nuk e bëjnë këtë të keqe pa arsye.
“Një nga arsyet më të mëdha për këtë të keqe është se këto kompani janë në thelb të përkushtuara për ruajtjen e rendit global eksploatocionist dhe janë totalisht të varura nga kapitali global. Të gjithë e dinë se kush kontrollon një pjesë të konsiderueshme të kapitalit global. Këto kompani mediatike e dinë shumë mirë se çfarë do të ndodhë nëse nuk i mbulojnë apo legjitimojnë sulmet dhe krimet e luftës izraelite. Nëse nuk e bëjnë, do të bëhet e qartë se vlerat e ashtuquajtura të larta perëndimore, idealet e ashtuquajtura, pas të cilave grupet e privilegjuara ndjekin udhëzimet dhe shfrytëzojnë të gjithë botën, në fakt nuk janë gjë tjetër veçse një mashtrim. Shtëpitë mediatike në fjalë po bëjnë përpjekje të mëdha për të mashtruar opinionin publik botëror dhe pjesa më e madhe e kësaj përpjekjeje shpenzohet për përhapjen e gënjeshtrave dhe lajmeve të rreme e jo për fshehjen e fakteve. Po, ne jemi përballur me dezinformim sistematik dhe ky dezinformim sistematik nuk është një situatë që është rezultat i inflacionit të informacionit të gjeneruar rastësisht, por është rezultat i të këqijave që kanë kryer madje edhe mediat kryesore perëndimore. Kjo fushatë dezinformimi dhe lajmesh të rreme sistematike është në thelb rezultat i një shfaqjeje për të mbuluar mizorinë dhe të keqen”, tha Altun.
Sipas tij, përpjekjet izraelite për dezinformim, të cilat janë kryer njëkohësisht me sulmet, janë kryer jo vetëm me urdhër anonim, por edhe nga zyrtarë të lartë të vendeve të mëdha.
Duke thënë se po bëjnë çmos për të luftuar këtë fushatë dezinformimi, Altun tha se Türkiye po përpiqet me përpjekje intensive të “heqë mbulesën nga e vërteta dhe të tërheqë shpejt vëmendjen ndaj fakteve të gjithë opinionit publik botëror”.
“Përpjekje të tilla, të cilat tentojnë të manipulojnë perceptimet e opinionit publik botëror për të mbuluar krimet e luftës dhe për të legjitimuar gjenocidin, ndodhen në hapësirën tonë dhe, në fakt, ekziston mundësia që ato të hapin derën e një krize shumë më të thellë në botë. Megjithatë, ne nën udhëheqjen e presidentit tonë Recep Tayyip Erdogan, vazhdojmë të mbrojmë paqen, drejtësinë dhe të vërtetën, por jo shtypjen. Do të vazhdojmë të luftojmë kundër padrejtësisë dhe shkeljeve të të drejtave të njeriut”, tha Altun.
Ai tha se kanë parë se qëndrimi i Türkiyes në favor të drejtësisë dhe së vërtetës i ka shqetësuar seriozisht disa njerëz.
“Ne do të vazhdojmë të bëjmë gjithçka për t’i dhënë fund kësaj tragjedie humanitare sa më shpejt të jetë e mundur, pavarësisht se kush shqetësohet apo kundërshton. Do të vazhdojmë ta bëjmë këtë në fushën e politikës së jashtme dhe iniciativave diplomatike. Do të vazhdojmë t’i flasim me zë të lartë gjithë botës se burimi i shumë problemeve në Lindjen e Mesme është në fakt një problem më themelor dhe emri i këtij problemi është ‘problemi izraelit'”, tha Altun.
Sipas tij, si shtete turke, ata mbështeten në traditën shtetërore të rrënjosur thellë që daton mijëra vjet.
Altun deklaroi se ata janë përfaqësues të një qytetërimi të lashtë në shekullin e 21-të.
